ERREGIONALEN OHOREZKO MAILA
Zumarragan partida berdindua eta golez betetakoa jokatu ostean (8 izan ziren guztira, alajaina), larunbata arratsean beste aukera bat izanen du taldeak garaipena eskuratzeko. Egia esanda, urte honetan taldeak aurrepauso nabaria egin du txapelketako partidetan emaitza onak eskuratuz eta poliki poliki goiko postuetan kokatzen hasi da. Beriora Ostadar SKT talde lasartearrak eginen du bisita eta hauek sailkapenean geure behean agertzen diren lehen taldea izanik gogotsu etorriko dira, geureekiko duten aldea murrizteko helburu garbiarekin. Geureak norgehiagokarako prest dira dagoeneko.
Partida larunbatean 17:25 tan Berio futbol zelaiean.
GORENGOEN MAILA
Oiartzun KEren aurkakoan garaipena eskuratu ondoren eta igoera fase honetan lehen hiru puntuak boltsikoratuta, taldeak atseden jardunaldia izanen du asteburu honetan. Lan saioetan arreta jarri eta hurrengo asteburuan izanen den neurketan pentsatzen hasiko dira geure jokalariak apurka apurka. Asteburu ona igaro dezazuela beraz.
KADETEEN OHOREZKO MAILA
Partida bat gutxiagorekin bada ere, Cotiren taldea sailkapeneko liderra da 25 puntu bikainekin. Debagoiena eskualdeko Oñati herrian jokatutako partidan eroso gailendu ostean, igandean Zumaiako FT jasoko dugu geure etxean. Zumaiarrei kosta egiten ari zaie txapeldunen fase honetan punturen bat batzea, ordea haien puntu – kutxategia estreinatzeko gogo biziz etorriko dira ziur. Lidertza sendotzeko asmoarekin zelairatuko da talde urdina eta helburu hori lortzeko partida on bat egin beharko dela jakitun. Igandean ikusiko dugu elkar.
Partida igandean 10:40 tan Berio futbol zelaian.
INFANTILEN OHOREZKO MAILA
Txapelketa faseko hamabigarren jardunaldia jarriko da martxan asteburu honetan. Ez ziren batere zapore gozoarekin irten jokatutako azken partidatik geure neskak eta berehala bolada ona hartu nahiko lukete larunbatean jokatuko den partidan. Partida ez da batere samurra izanen, Tolosa CF talde urdina izango dute aurrean sailkapenean bigarren postuan kokatutak daudenak eta garaipena beharko dutenak ziurtasun osoz. Ordea, ez da aukera batere makala geure taldearentzat, garaipena lortuz gero tolosarren puntu bakarrera kokatuko ginateke eta.
Partida larunbatean 12:30 tan La Salleko futbol zelaian.
