ERRONKA BERRIA BEÑATENTZAT
Beñat San Jose entrenatzaile donostiarrak badu dagoeneko aulki berri bat bere ibilbideari jarraipena emateko. Geure entrenatzaile ohiak aski ezaguna duen Bolivar talde bolibiarraren eskaintza onartu eta dagoeneko bertara bidean da lanari ekiteko.
Gogoan izan behar dugu 2016-17 denboraldian ere bertan egon zela eta urte benetan arrakastatsua izan zuela, izan ere, urte horretan bertan bi aldiz izan zen txapeldun Beñat bere taldearekin, irekiera eta itxiera faseak irabazi baitzituen.
Beñatek azkeneko lan esperientzia Mazatlan FC talde mexikarrean egin zuen eta orduz geroztik lanik gabe egonda, ziur etengabeko formakuntzan aritu dela aukera baten esperoan eta berau iritsi zaio, gainera aski ezaguna duen klub batetan.
Gogoan hartu behar dugu Beñat geure denboraldiko galan gonbidatu eta saridun gisa izan genuela eta berak beti esan ohi duenez oso eskertuta dago Antiguoko KEri, klubak bere hastapenetan eman zion aukera bikainagatik.
Zorterik onena eta gertutik jarraituko zaitugu Beñat.
