Urriaren hirugarren asteburu honetan ez dago atsedenik. 4 partida etxean eta 2 kanpoan dena eman eta ahalik eta gehien gozatzeko. Azpimarratzekoa bigarren taldeak Realaren aurka jokatuko duen lehia eta Infantil Handiak izango duen derbi zirraragarria.
Jubenil Nazionala
Partida zirraragarria eta maila altukoa larunbatean Berion jokatuko dena. Izan ere, Unai Gazpioren taldeak Realarekin neurtuko ditu indarrak. Une bikainean dago taldea, eta emaitzek hori islatzen dute: bigarren postuan kokatuta dago, 13 punturekin. Bien bitartean, talde txuri urdina sailkapenaren erdialdean dago oraingoz, 9 punturekin. Etxean trataezin baina Zubietatik kanpo kostatzen ari zaio puntuak pilatzea. Dena den, aintzat hartu beharreko arerioa da, jokalari apartak eta kalitate handia duen taldea baita. Konfiantza eta ilusioa nagusi da gure aldagelan, eta hiru puntuengatik borrokatzeko prest daude mutilak.
Partida larunbatean 17:25etan Berioko instalazioetan.
Euskal Jubenila
Gariren taldeak garaipenaren bidera itzuli nahi du Gobelan eta aurreko astean etxean lehen aldiz estropezu egin ostean. Mutilek ondo lan egin dute astean zehar, larunbatean zelai zinez zail batean partida handia egingo dutela sinetsita. Sailkapenean 10 punturekin daudelarik, aurrean Loyola Indautxu izango dute. Talde bilbotarrak bigarren denboraldia darama euskal ligan, eta etxean lortutako emaitzak benetan apartak izan dira. Hala, 90 minutuetan zehar arreta eta oreka mantentzen funtsezkoa izango da Antiguara zerbait positiboa ekartzeko.
Partidua larunbatean 19:30etan Aitxarte futbol zelaian (Bilbo).
Euskal Kadetea
Garaipen gosez da Julenen taldea, azken bi partidetan puntu bakarra eskuratu baitu. Etxean jokatuko du berriz, eta aurrean Gernika izango du, oraingoz 3 puntu atera dituen taldea. Bizkaitarrek gogora dezagun aurreko urtean lortu zutela igoera. Azken bi partidetan, esan bezala, ez dugu garaipenik lortu, eta hortaz, mutilek lana gogor egin dute aste honetan etxean garaipenaren bidera itzuli eta sailkapenaren goiko aldean finkatzeko asmoz. Partida bikaina egingo dugu, ziur. Goazen!
Partida igandean 12:10ean Berioko instalazioetan (Vitoria-Gasteiz).
Ohorezko Kadetea
Berriro ere etxean jokatuko du Iraolaren taldeak. Aurreko astean Euskaldunaren aurka garaipena lortu ostean, 7 punturekin kokatzen dira mutilak, baina gehiago nahi dute. Horretarako, Ordizia izango dute aurrean, oraindik garaipena ezagutzen ez duen arerioa. Puntu gehiago merezi arren, goierritarrek dena emango dute 3 puntuak eskuratu ahal izateko. Ondorioz, gureek intentsitate altuarekin jokatu beharko dute, eta erakusten ari diren defentsa maila berarekin jarraitu beharko dute.
Partidua larunbatean 10:30etan Berioko instalazioetan.
Infantil Handi
Añorgaren aurka jokatuko du Uritzen taldeak denboraldiko laugarren jardunaldia. Porrot batekin hasi bazen liga ere, mutilek bikainki eman diote buelta istripu horri eta bi garaipen erdietsi dituzte Vasconia eta Kostkas bezalako arerio onen aurka. Oraingoan ere talde donostiar bat izango du aurrean, Añorga K.K.E. Zementu-taldeak ez du nahi bezala hasi denboraldia, baina argumentu nahikotxo ditu Berion partida on bat egin eta gauzak zail jartzeko gureei.
Partida larunbatean 13:50etan Berioko instalazioetan.
Infantil Txiki
Beldaren mutilek erronka zail bati egin beharko diote aurre larunbat eguerdian. Izan ere, Arrupe Chaminade izango dute aurkari Felix Garin zelai zailean. Groseko taldea, azken bi partidak diferentzia handiz irabazi ostean, bolada horri jarraipena ematen saiatuko da. Gureak, bien bitartean, gozatu, ongi jolastu eta golak sartzeko aukera izan dute lehen hiru partidetan, eta espero dugu bide beretik jarraitzea.
Partidua larunbatean 13:30etan Felix Garin futbol zelaian.
